Si ta ndreqim Windows XP (Part 1)?

Nuk jeni të mendimit se meritoni më tepër, qoftë nga Vista, qoftë nga XP-ja? Në këtë shkrim po ju japim disa këshilla, ku e ku lehtësisht të gjendshme e ku e ku të imta për t'u kapur, se si ta bëni sistemin operativ të kompjuterit më efikas, më efiçent dhe më të qëndrueshëm. Gjithsesi, bëni mirë të tregoni kujdes mos t'i dreqosni më keq gjërat, por t'i ndreqni me aq sa mundësi ndreqjeje kanë sistemet operative.

Pavarësisht nga përmirësimet dhe përvoja e përbashkët e miliona përdoruesve, Windows mbetet akoma plot me gabime, enigmatik dhe plot surpriza, si gjithmonë. Çdo dalje e re e sistemit të shfrytëzimit shton një përmirësim të vogël dhe disa veçori të reja, por, njëkohësisht, edhe shumë kokëçarje. Ndonjëherë veçoritë e reja dhe funksionet e përmirësuara të Vista-s jo rrallë të ngrejnë qimet përpjetë. Paketa e Parë e Shërbimeve të Vista-s, SP1, e cila ka dalë gjatë muajit prill dhe tashmë është e shkarkueshme, duket se nuk i ka bërë çare gjithë problemeve të shfaqura në kohë. Sipas shumë ekspertëve, SP3 i XP-së, që pritet të dalë shumë shpejt, është ku e ku më i dashur për përdoruesin se sa Vista.

Për fatin e mirë, nuk ju duhet të shpenzoni shumë orë duke kërkuar kurat për sëmundjet e Windows-it. Ne kemi përpiluar rregullimet më të rëndësishme dhe disa përmirësime që mund t’i zbatoni në vetëm pak minuta. Këto këshilla do të shpejtojnë hapjet dhe mbylljet, do të automatizojnë mirëmbajtjen e sistemit dhe, madje, do të shpejtojnë edhe shfletimin tuaj në Internet.





Përshpejtojeni ca hapjen e Windows-it
Problemi: Windows hapet përherë ngadalë.
Ndreqja e parë: Kompjuteri mund të ngarkojë drajvera pajisjesh për harduer, të cilat ju nuk i përdorni më. Për të kursyer resurset e sistemit, çinstalojini këto drajvera. Meqenëse një zgjedhje e pakujdesshme mund të bëjë që kompjuteri të humbasë ndonjë funksion të rëndësishëm, gjithsesi, krijoni një pikë rikthimi te System Restore përpara se të vazhdoni.

Normalisht, Device Manager nuk i shfaq pajisjet që nuk janë të lidhura në kompjuter. Për ti bërë ato të dukshme, shtypni Windows-R, që hap kutinë Run, shtypni cmd dhe pastaj shtypni Enter. Në promptin e komandave, shtypni set devmgr_show_nonpresent_devices=1 dhe Enter. Lëreni dritaren e promtit të komandave hapur.

Tani shtypni përsëri Windows-R, shkruani devmgmt.msc dhe shtypni Enter. Në dritaren e Device Manager, zgjidhni View, Show Hidden Devices. Klikoni shenjën plus (+), në çdo degëzim, për të parsë të gjithë drajverat në kompjuterin tuaj. Pajisjet që nuk janë të lidhura shfaqen me një ikonë të zbehtë. Nëse shihni pajisje për të cilat jeni të sigurt se nuk i përdorni më, klikoni me të djathtën mbi të dhe zgjidhni Uninstall. Pastaj, për të përfunduar procesin, ndiqni mesazhet që shfaqen në ekran. Me të mbaruar, mbyllni dritaren e promptit të komandave, për të fshehur kësisoj pajisjet e palidhura.

Ndreqja e dytë: Kur keni lidhur në kompjuter një disk rrjeti me një germë, Windows e hap automatikisht atë lidhje, sa herë që ju hapni kompjuterin. Duke qenë se rihapja e lidhjeve të rrjetit kërkon kohë, mund t'i përshpejtoni hapjet duke i hequr lidhjet e papërdorshme.

Shtypni Windows-E, për të hapur Windows Explorer, dhe Alt-T, D për të hapur kutinë dialoguese Disconnect Network Drives. Zgjidhni disqet e rrjetit që doni të shkëpusni dhe klikoni OK.

Në të ardhmen, nëse lidhni një disk rrjeti vetëm për sesionin aktual, thjesht futni shtegun e tij (kjo shfaqet në rreshtin e adresave kur ju zgjidhni diskun në Explorer dhe në kutinë Run). Ose, nëse në Explorer përdorni komandën Tools – Map Network Drive, përpara se të klikoni Finish, sigurohuni që Reconnect at logon të mos jetë e shënuar.

Ndreqja e tretë: Gjatë këtij hapi do të lironi kujtesën e kompjuterit dhe do të riktheni ciklet e procesorit, duke pastruar çrregullimet që hapen çdo herë që hyni në Windows. Madje, gjatë këtij procesi mund të zbuloni edhe disa programe keqbërëse. Përdorni programin falas Autoruns nga Sysinternals.

Si t’i dalloni programet e vlefshme në hapje nga ato të pavlefshme? Për këtë mund të konsultoni mjetet e integruara të Autoruns, ose mund të kërkoni në Internet nga burime të ndryshme. Listat e kërkueshme dhe të shkarkueshme të programeve të zakonshme aktive gjatë hapjes kanë një përshkrim dhe klasifikim për çdo program, duke treguar nëse ai duhet apo jo në një sistem të zakonshëm.







Ulni ngarkesën e shkaktuar nga aplikimet
Problemi: Unë nuk dua që një kalë Troje, ose ndonjë tjetër program keqbërës të sulmojë a të zotërojë kompjuterin tim, por hyrja si përdorues standard ka shumë kufizime.
Ndreqja: Edhe në qoftë se hyni si administrator, privilegjet për hapjen e aplikimeve janë sërish të kufizuara. Nisjani duke përdorur koleksionin e mjeteve ndihmëse falas PsTools nga Microsoft . Dekompresoni përmbajtjen në një direktori dhe zhvendoseni direktorinë në vendin e aplikimeve tuaja. Mjeti PsExec u parashikua për hapjen e aplikimeve nga larg, por mund ta përdorni, po ashtu, edhe për të hapur programe me privilegje të kufizuara.



Për të krijuar një shkurtesë që hap Internet Explorer 7 ose çdo aplikim tjetër me kufizime, tërhiqni, duke klikuar me të djathtën, shkurtesën e tij te një vend tjetër. (Mund të përdorni versionin normal me privilegje të larta të shkurtesës, kështu që është mirë ta lini origjinalin të paprekur). Zgjidhni Copy Here. Klikoni me të djathtën mbi shkurtesën e kopjuar dhe zgjidhni Properties. Me skedën Shortcut aktive, klikoni në fillim të kutisë Target dhe shtypni rrugën për te PsExec, para rreshtit ekzistues të komandave. Pastaj lini një hapësirë, të ndjekur nga -l -d (një vizë në mes, germa l, një hapësirë, një vizë dhe germa d). Së fundmi, shtypni një hapësirë tjetër. Çelësi '-l' ul privilegjet e programit, ndërsa çelësi '-d' bën që dritarja e promptit të komandave të mbyllet me t'u hapur aplikimi. Kur të keni mbaruar, teksti te kutia Target duhet të duket pak a shumë kështu: "C:\Program Files\PsTools\ psexec.exe" -l -d "C:\Program Files\Internet Explorer\iexplore.exe" (shtigjet tuaja mund të ndryshojnë). Klikoni Change Icon, OK. Specifikoni shtegun te skedari origjinal (iexplore.exe në rastin tonë) dhe klikoni OK, derisa të mbyllen të gjitha kutitë dialoguese.Për të shmangur kufizimet në aktivitete të tilla si instalimi i plug-ins për shfletuesin, duhet ta ekzekutoni shfletuesin në modalitetin e tij normal, me privilegj të lartë.

Përsërisni këto hapa për çdo shkurtesë që doni të ekzekutoni me privilegje më të ulëta.