Kapet gomonia me 115 kg kanabis, arratisen trafikantët

Plot 115 kilogramë kanabis që kishte destinacion Italinë u bllokuan në bregun shqiptar të detit Jon. Operacioni u krye nga Policia kufitare e qarkut të Vlorës që zhvilloi gjatë natës një operacion antitrafik.
Drejtori i policisë së Kufirit dhe Migracionit në Qarkun e Vlorës, Myzafer Elezi, bëri të ditur se në të gdhirë të ditës së sotme u bllokua një lundrues, tip gomone në hapësirën detare, në jugperëndim të Gadishullit të Karaburunit.

“Gomonia me gjatësi 4.5 metra u diktua nga policia kufitare e cila, e mbështetur dhe nga forcat e Repartit Antitrafik Delta Force, u vu në ndjekje të saj, për ta bllokuar pas një operacioni që zgjati më shumë se një orë” tha Elezi.

Personat që ndodheshin në të mundën t’i largohen me shpejtësi policisë duke lënë pas plot 115 kg kanabis sativa.

Nga hetimet paraprake dyshohet se lënda narkotike ishte nisur për në Itali. Aktualisht, policia po heton rreth këtij rasti të trafikut të lëndëve narkotike dhe personave që kanë lidhje me të.

Dyshohet se një rrjet i mirëorganizuar i lëndëve narkotike vepron nga Shqipëria në Itali. Policia sqaron se këtë mund ta zbardhin vetëm nesë arrihen të vihen në pranga pronarët e gomones