Programe per me ndreq foto

Nuk keni pse të hallakateni më nga njëri program fotosh te tjetri, vetëm për të zvogëluar fotot tuaja familjare. Image Resizer ju kryen punë brenda pak sekondash.


Tashmë thuajse të gjithë janë shndërruar në fotografë amatorë. Por softuerët e specializuar për modifikimin e fotove nuk janë zgjedhja më e mirë për të gjithë. Dy aplikacionet e mëposhtme mund ta shndërrojnë fotografinë dixhitale në zbavitje të vërtetë.



Image Resizer

Dëshironi të ndryshoni tak-fak përmasat e një grupi fotografish? Përvetësoni këtë lodër lehtësisht të përdorshme të Microsoft. Klikoni me të djathtën mbi një fotografi të vetme, ose mbi një grup fotosh dhe zgjidhni Resize Picture (Ndrysho Përmasat e Fotos). Si pasojë, do t’ju shfaqet një dritare që ju ofron 4 variante përmasash për fotografitë: I vogël (Small) 640 me 480 pikselë, Mesatar (Medium) 800 me 600 pikselë, I madh (Large) 1024 me 768 pikselë dhe Kompjuter dore (Hand-held PC) 240 me 320 pikselë. Pasi të keni bërë zgjedhjen e dëshiruar, klikoni OK dhe programi do të krijojë kopje të fotove me përmasat e reja, duke i lënë të paprekura origjinalet. Nëse klikoni butonin Advanced përpara se të klikoni OK, mund të zgjidhni që të ndryshojnë përmasat e fotove origjinale pa krijuar kopje të reja.

Shënim: Fotot vetëm mund t’i zvogëloni dhe jo t’i zmadhoni. Nëse zgjidhni përmasa më të mëdha se origjinalet, programi s’do t’ju bindet.



Photoscape

Photoscape është një tjetër aplikacion i njohur që një fotograf me ndjenjë të lartë vetëvlerësimi do të donte ta kishte në kompjuterin e tij. Ky program përfshin një eksplorues skedarësh, modifikues fotosh, krijues prezantimesh (slide show creator), modifikues automatik (batch editor), përzgjedhës ekrani dhe shumë më tepër. Photoscape përmban edhe disa mjete origjinale, si p.sh. kombinimin e disa fotove në një kornizë të vetme. Një tjetër mjet praktik është në gjendje të konvertojë fotot e formatit RAW (që përdoret nga shumë aparate dixhitale) në formatin JPG, në mënyrë që të hapen në shumë aplikacione.