Si ta rrisim shpejtësinë e shfletimeve?

Edhe pse ISP-të ta matin kokën me spango për një Internet të shpejtë, sërish performanca nuk është gjithmonë ajo që pritet. Sigurohuni që të keni modemin e fundit që ofron ISP-ja juaj. Zakonisht ata ta sjellin më të riun duke u bërë një telefonatë, megjithëse për disa ISP kjo nuk është e vlefshme dhe mud të kërkojë ndofarë rinovimi të kontratës.

Për të arritur maksimumin e performancës në rrjet, në XP apo në Vista, ne preferojmë programet Tweak-XP Pro Premium dhe TweakVI Premium. Të dy këto aplikacione e përmbushin misionin, pa bërë modifikime të regjistrit dhe pa aksesuar skedarët e fshehur të Windows-it. Të dyja paketat përfshijnë dhjetra truke në drejtim të përmirësimit të përvojës së shfletimit dhe të lundrimit në rrjet. Vlen të përmendim edhe Network Magic Pro, i cili arrin gjithashtu një nivel të kënaqshëm optimizimi.

Optimizimi i sistemit është më pak i rëndësishëm në Vista se në XP, meqenëse Vista e akordon në mënyrë dinamike stivën TCP (TCP është një protokoll për shkëmbimin e të dhënave). Përdoruesit e Vista-s mund t’ia hedhin në shumicën e rasteve, thjesht duke optimizuar programe të veçantë, veçanërisht shfletuesit e uebit. Për të përshpejtuar Firefox-in, provoni njëherë Firetune ose Fasterfox. Fasterfox përmban edhe disa opcione optimizimi shtesë për përdoresit ekspertë. Secili prej aplikacioneve përmban konfigurime të thjeshta, si kapacitetin i kujtesës kashe (cache), maksimizimin e lidhjeve të njëkohshme dhe “pipelining” (trajtimin e njëkohshëm të disa kërkesave për të dhëna).

Të apasionuarit pas shkarkimeve mund të kursejnë kohë me një program për menaxhimin e shkarkimeve si Download Accelerator Plus, i cili menaxhon të gjithë procesin e shkarkimit, krijon disa lidhje të njëkohshme shkarkimi dhe pastaj e bashkon të gjithë skedarin në një të vetëm. Thjesht klikoni download (shkarko) dhe pjesën tjetër lerjani në dorë programit. Ai arrin të integrohet më së miri me Internet Explorer dhe me Firefox.